Ձեր վստահելի աղբյուրը

2011 թվականին, 2010-ի համեմատությամբ, զգալիորեն ավելացել են ԶԼՄ-ների և լրագրողների իրավունքների խախտումները` զգալիորեն աճել է ԶԼՄ-ների և դրանց աշխատակիցների վրա ճնշումների քանակը. այս առումով առավել լարված էին առաջին և չորրորդ եռամսյակները: Սակայն 2010-ի համեմատ` նվազել են ֆիզիկական բռնությունների դեպքերը և տեղեկություններ ստանալու ու տարածելու իրավունքի խախտումները: Այս մասին ասուլիսում հայտարարեց Խոսքի ազատության պաշտպանության կոմիտեի նախագահ Աշոտ Մելիքյանը` ներկայացնելով Խոսքի ազատության պաշտպանության կոմիտեի պատրաստած տարեկան զեկույցը` երկրում խոսքի ազատության վիճակի և լրագրողների ու ԶԼՄ-ների իրավունքների` ԽԱՊԿ-ի արձանագրած խախտումների վերաբերյալ:

Ըստ զեկույցի, լրագրողների նկատմամբ ֆիզիկական բռնությունների առումով, այս տարին պակաս լարված էր՝ նախորդ երեք տարիների համեմատ: Տարվա ընթացքում ԽԱՊԿ-ն արձանագրել է 5 նոր դեպք, մինչդեռ 2008 թվականին գրանցվել էր լրագրողների նկատմամբ ֆիզիկական բռնության 18 դեպք, 2009 թվականին` 11, իսկ 2010 թվականին` 9:

Ամբողջ տարվա ընթացքում լրատվամիջոցների և դրանց աշխատակիցների նկատմամբ ճնշումներ գործադրելու դեպքերի ցուցանիշը մշտապես բարձր է եղել` ի տարբերություն նախորդ տարիների: 2011 թվականին ԽԱՊԿ-ն արձանագրել է 49 միջադեպ: Համեմատության համար` նշվում է, որ 2008 թվականին գրանցվել էր լրատվամիջոցների և դրանց աշխատակիցների նկատմամբ ճնշումների 16 դեպք, 2009-ին` 14, իսկ 2010-ին`19:

2011 թվականին ԽԱՊԿ-ն գրանցել է տեղեկություններ ստանալու և տարածելու իրավունքի խախտումների 7 նոր դեպք, մինչդեռ 2008 թվականին գրանցվել էր 14, 2009-ին` 13, իսկ 2010-ին՝ 18 դեպք:

Ըստ զեկույցի, 2011 թվականն աննախադեպ էր ԶԼՄ-ների դեմ դատական գործերի քանակով. «Լրատվամիջոցների դեմ դատական այս գործընթացները միտում ունեն ֆինանսական կոլապսի մեջ գցելու առանց այն էլ դժվարին պայմաններում լրատվական գործունեություն իրականացնողներին և լռեցնելու հատկապես անցանկալի ԶԼՄ-ներին: Բացի այս` նման իրավիճակում առավել մեծանում է լրատվամիջոցներում ինքնագրաքննության վտանգը, ինչպես նաև` ի հայտ են գալիս թաքնված գրաքննության տարրեր»,- նշված է զեկույցում:

Ինչ վերաբերում է լրատվամիջոցների գործունեությանն առնչվող այլ իրադարձություններին, զեկույցում նշվում է, որ 2011 թվականի հունվարի 21-ից փոփոխություններ են տեղի ունեցել հայկական հեռուստաեթերում: Դադարեցվել է մի քանի հեռուստաընկերությունների եթերային հեռարձակումը, որը պայմանավորված էր ՀՌԱՀ-ի անցկացրած՝ թվային հեռարձակման ցանցի միջոցով հեռուստահեռարձակողների լիցենզավորման մրցույթների արդյունքների ամփոփմամբ: